23 ára gamli álopsleikarin Patrik Johannesen hevur gjørt ein tvey-ára sáttmála við KÍ. Har skal hann avloysa Páll A. Klettskarð, sum fer av landinum eftir hetta kappingarárið.

- Eg valdi KÍ eftir at hava tosað við Mikkjal um KÍ og hvussu hópurin arbeiðir og venur. Eg rokni við, at eg passi væl inn í KÍ og leikluturin verður nokk líknandi honum, sum Páll hevur havt, sigur Patrik Johannesen sum váttar, at fleiri feløg høvdu áhuga at fáa hann í sín hóp.

Ment seg sum persón

Patrik hevur seinasta árið spælt í Florø í næstbestu norsku deildini. Har hevur hann eisini verið nógv skaddur.

- Hetta hevur verið ein tíð, har tað hevur gingið upp og niður. Eg fekk ein skaða, har liðbandið næstan fór, men síðani í summar havi eg verið frískur og heilt klárur. Eg haldi, at eg havi ment meg sum persón, meðan eg sum leikari eri áleið tann sami. Málið hjá okkum er at spæla við í toppinum næsta ár, sigur Patrik Johannesen við Norðlýsið.

Patrik Johannesen er givin í Florø og býr nú í Tórshavn, har hann eisini kemur at búgva, meðan hann spælir við KÍ.