Bretland er tað landið uttanfyri Føroyar, har eg havi búð longst. Eg øtist við, hvussu vánaligt sambandið er, og hvussu lítið vit í Føroyum fylgja við í tí sum fyriferst hjá okkara nærmasta granna. Vit føroyingar vita meir um, hvør er við í danska X faktor, enn hvør situr í stjórn í Bretlandi. Kringvarpið brúkti danska Ritzau sum keldu, tá forkvinnan í skotska tjóðskaparflokkinum fór frá, heldur enn at citera bretskar miðlar.

Vit innrætta okkum í nógvum førum, sum Danmark er einasta portur út í heimin, og sum um at vit noyðast at keypa somu vørur, sum man keypir í Danmark.

Hygg at Heilsufrøðiligu Starvsstovuni, sum kopierar ávaringar frá danska Fødevarestyrelsen, hvørja ferð okkurt markvirði í onkrum vistfrøðiligum műsli er eitt sindur við síðirnar av. Hvat við matvørum, ið verða innfluttar úr Bretlandi? Har er ikki nógv í løtuni, men vónandi verður tað nógv meir í framtíðini. Skal so Heilsufrøðiliga Starvsstovan kopiera frá heimasíðuni hjá bretska Food Standards Agency, hvørja ferð okkurt slag av tofu er skeivt merkt?

Bretland er ein nógv størri og meira fjøltáttaður marknaður enn Danmark nakrantíð fer at gerast, og um ungdómur vil royna seg í vinnu, mentan ella gransking, so eru møguleikarnir risastórir í Bretlandi við sinum 70 milliónum fólkum, og tí sambandi Bretland hevur til allan heimin.

Tað er ikki tí, at eg havi ein trupulleika við samhandli við Danmark, men tað má verða tí, at tað loysir seg, heldur enn av gomlum óvana. Tað skal so ikki verða tí, at almennu Føroyar ikki duga at hyggja út í heim, uttan ígjøgnum eitt danskt filtur.

Eg haldi, at vit politiskt eiga at leggja okkum eftir at økja um alt samband við Bretland, bæði handilsliga, útbúgvingarliga og mentanarliga. Vit eiga at banka á allar dyr hjá bretum fyri at fáa sum mest av samhandli við so fríari atgongd sum gjørligt fyri vørur og tænastur báðar vegir.

Alt fyri einar liviligari - og fyri brúkaran - bíligari Føroyar.

Ben Arabo, Javnaðarflokkurin