Ótroyttiligi Zacharias Hammer aftur aktuellur
Hann hevur ríkað okkum í fleiri áratíggju. Líka frá grulvistøðinum hjá Sjónvarpi Føroya í 1980’unum gjørdi hann professionellar barnasendingar, og seinni eru tað uppaftur meira professionellu dokumentararnir, sum eru vorðnir hansara vørumerki.
Tað undrar, at Zacharias Hammer ikki hevur fingið nakra mentanarheiðursløn ella líknandi viðurkenning fyri síni mentanarligu avrik ígjøgnum fýra áratíggju. Og tað er heldur ikki ein tílík viðurkenning, sum drívur verkið, men heldur ein eldhugi og nærlagni saman við einum stórum áhuga fyri fiskivinnuna.
Tað prógvar Zacharias við dokumentarfilminum Línumenn, ið verður vístur hvørt gerandiskvøld í Torravikuni í Atlantis í Klaksvík.
Filmurin vísir millum annað arbeiðsdagin hjá føroyskum sjómonnum á Flemish Cap, og fleiri av filmatiseraðu vinklunum eru ótrúligir. Umfrant samrøður er eisini hópin av gomlum myndum av sjómonnum, reiðskapi og umstøðunum umborð.
Filmurin verður sýndur mánakvøldið 18. til fríggjakvøldið 22. februar, øll kvøld kl. 20-22, og eitt atgongumerki kostar 150 krónur.
Sí brot her.