Fiskivinnupolitiskur toppfundur á Torradøgunum
Hvussu hilnast fiskivinnunýskipanin, hvat liggur á láni og hvat skal broytast? Allir poltisku flokkar eru við í stóra, almenna kjakfundinum á Torradøgunum í Klaksvík
Lógin um fyrisiting av sjófeingi kom í gildi 1. januar í fjør, og fiskivinnunýskipanin hevur harvið sítt fyrsta ár á baki. Men hvussu hilnast fiskivinnunýskipanin? Allir flokkar á løgtingi geva sítt boð uppá, hvat riggar og hvat ikki riggar við nýskipanini?
Menningarkvoturnar hava verið nógv umrøddar, og vit kjakast um, hvussu hesin nýggi leisturin roynist. Eitt nýtt lógaruppskot um veiðugjøld er á veg í løgtingið, og eisini tað verður á breddanum á kjakfundinum. Spurt verður millum annað, hvussu tilfeingisrentan skal krevjast inn, og hvør skal gjalda fyri rættin at fiska.
Tvær ferðir er skiftið frá eini fiskidagaskipan til eina kvoturskipan útsett. Nú stendur í lógini, at trolarar í bólki-2 og línuskipini í bólki-3 skulu fara yvir til eina kvoturskipan á nýggjárinum. Men hvat siga politisku flokkarnir til hetta skiftið?
Løgtingsval stendur fyri framman, men hvørja fiskivinnupolitiska kós ætla flokkarnir at seta út í kortið eftir valið?
Luttakarar
Aksel V. Johannesen, Javnaðarflokkurin
Høgni Hoydal, Tjóðveldi
Jørgen Niclasen, Fólkaflokkurin
Bárður Nielsen, Sambandsflokkurin
Poul Michelsen, Framsókn
Jógvan Skorheim, Sjálvstýri
Bill Justinussen, Miðflokkurin
Vertir:
Beinta Løwe
Jón Brian Hvidtfeldt
Kringvarpið skipar fyri fiskivinnupolitiska kjakfundinum,, sum er partur av Torradøgunum í Klaksvík. Fundurin er almennur og verður hildin í Miðhøllini í skúlanum á Skúlatrøð, mikukvøldið 20. februar klokkan 19. Fundurin verður sendur beinleiðis í útvarpi og sjónvarpi.
Hvar: Miðhøllin í skúlanum á Skúlatrøð
Nær: Mikukvøldið 20. februar kl. 19