Hey letur handil upp í Klaksvík í dag
Soljóðandi tíðindaskriv er í dag sent fjølmiðlunum: "Í dag letur Hey handil upp á Stangavegi 53 í Klaksvík, har Nema heldur til.
Hetta er enn eitt stig, í at samantvinna fyritøkurnar í samtakinum, soleiðis at vit kunnu bjóða eitt fjølbroytt útboð av vørum og tænastum innan fjarskifti, KT og KT-vørum til bæði vinnu og privatar brúkarar kring alt landið, sigur Júst í Túni Vang, stjóri á Hey og Nema.
Vit arbeiða allatíðina fyri at kunna bjóða okkara kundum nýggjar og betur tænastur. Vit fegnast tí um at kunna lata handil upp í Klaksvík., sigur Rói B. Poulsen, sølustjóri á Hey.
Í hesum sambandi hava vit nógv góð tilboð og vælumtókta eyðnuhjóli hvar fólk kunnu vinna gigabyte til sítt fartelefonhald, bæði í dag og í morgin.
Øll eru hjartaliga vælkomin."
Í morgun var móttøka á Nema í Skálagarði. Stjórin á Nema og Hey Júst í Túni Vang greiddi frá samanleggingini av feløgunum báðum. Hann segði millum annað, at gongdin í KT vinnuni var alt meira og meira at samskifti og KT smeltaðu saman. Vit, sum arbeiða innan telduheimin hava brúk fyri telesamskiftinum og telesamskiftið hinvegin skal eisini brúka okkara vitan. Júst í Túni kom eisini inn á kappingina ímillum fibersambandið og tráðleysa sambandið. Hann metti, at ferðin á tráðleysa sambandinum skjótt fór at vera eins dygg og fasta sambandið ígjøgnum fiberkaðalar. Á mínari telefon er skjótari samband enn eg havi á telduni heima við hús, segði hann millum annað.
Annars segði Júst í Túni Vang eisini, at Nema og Hey ætlaðu at menna deildina í Klaksvík einn meira, og at tað um stutta tíð helst fóru at arbeiða fleiri fólk á deildini her.
Jógvan Skorheim, borgarstjóri heilsaði nýggja átakinum hjá Hey og Nema vælkomnum í Klaksvík, men meira um tað seinni.