Høg og lág á seiðabergi beint eftir svarta oktober 1992
Nú so nógvur seiður er at síggja í Hvannasundi, minnast nógv fólk aftur á tá víkirnar fyltust við seiði í 1992, í svárastu krepputíð. Vit hava filmsupptøkur, sum Regin Samuelsen gjørdi.
Tá bankarnir fóru á heysin tann 6. oktober 1992 var álvarsom kreppa í Føroyum. Samstundis var fiskaloysi og hetta gjørdist m.a. byrjanin til eina stóra fólkafráflyting.
Í svárastu krepputíð fyltust víkirnar við seiði og í Klaksvík leitaðu fólk serliga oman í bátahylin á Borðoyavík at syfta seið.
Nógv kend fólk úr Klaksvík eru við á upptøkunum, m.a. sjálvur borgarstjórin Óli E. Heinesen.
Hetta er tíðin áðrenn internetið og fartelefonirnar tóku ræði á sosialu samveruni.
Upptøkurnar gjørdi Regin Samuelsen 20. til 23. oktober 1992.
Ólavur Wolles hevur sett upptøkurnar saman.