Í kvøld verður toppdystur í Klaksvík millum tvey av teimum fýra liðunum, sum eru fremst í Betri Deildini hjá monnum við 35 stigum. KÍ er oddalið í deildini við betri málmuni enn trý onnur lið, harímillum Víking.

Hjá KÍ hevur Deni Pavlovic leikbann, meðan stóra ivamálið er, um Simen Sandmæl, ið hevur verið sera avgerandi fyri KÍ í ár, verður tøkur eftir trupulleikar í rygginum sum m.a. gjørdu, at hann ikki var við móti ÍF mánakvøldið. Seinastu dystirnar hava Meinhardt P. Joensen, Ólavur Niclassen, Óli Ey. Poulsen, Magnus Stamnestrø og Darius Lewis verið skaddir, men eingin av teimum hevur spælt stórvegis leiklut síðstu vikurnar. Av teimum er møguleiki fyri, at Magnus og Darius vera tøkir hendan dystin. Hinvegin fekk Torbjørn Grytten ein skaða móti ÍF sum ger, at hann neyvan spælir komandi vikurnar. Hjá Víkingi er stóra ivamálið, um toppskjúttin Sølvi Vatnhamar verður við. Hann fór út við skaða seinasta dyst, men tað hevur verið mett, at tað er møguleiki fyri, at hann verður við.

Toppdysturin í Klaksvík í kvøld byrjar kl. 18.15 og dómari verður Alex Troleis.