Bókaframløga í Jacqson í Klaksvík
Stórur áhugi hevur verið fyri bókini “Góða systir. Ein dagbók til Arnvør”, sum Margit Martinsdóttir Baadsager, hevur skrivað.
Fysioterapeutur Martin Eliassen úr Klaksvík, vanliga nevndur GittuMartin, var pápi at bæði Margit og Arnvør.
Mikukvøldið 11. septembur kl 19.00 verður bókin "Góða systir" løgd fram í Jacqson í Klaksvík.
Skrá:
Herborg Torkilsdóttir og Rakul Petersen syngja 2-3 sangir.
Tóra við Keldu og Margit M. Baadsager práta um bókina.
Maria á Lakjuni syngur 2-3 sangir.
Eftir hetta verður høvi at ogna sær bókina.
Um bókina:
Tá ið læknarnir í 2015 síggja okkurt óvæntað í eini skanning av heilanum hjá 38 ára gomlu Arnvør, fara systirin Margit og mamma teirra við fyrsta flúgvaranum til Keypmannahavnar at vera hjá henni.
Arnvør hevur í eina tíð gramt seg um svára høvuðpínu og hevur ikki megnað at hildið freistirnar fyri síni Ph.D. verkætlan. Hon er vorðin sera gloymsk.
Komandi dagarnar á Ríkissjúkraúsinum versnar minni hjá Arnvør framvegis, og Margit velur at skriva henni eina dagbók.
"Góða systir" er ein hjartanemandi dagbók frá einari systir til aðra.
Bókin er persónlig og nemur á ein jarðbundnan hátt við evni sum familja, sjúka, viðgerð, trugv, lívsinnihalda, skemt, sorg, endurvenjing og vón, ið bæði sjúkingar og avvarðandi kunnu kenna seg aftur í.
Tiltakið er ókeypis og øll eru hjartaliga vælkomin.