Torbjørn Grytten er vandamikil álopsleikari
Norski álopsleikarin hevur verið nógv darvaður av skaða í ár.
Men tá 24 ára gamli álopsleikarin hevur spælt, so hevur hann mangan verið avgerandi. Hann hevur spælt í 331 minuttir í landskappingini. Teir minuttirnar hevur hann skorað tvey mál, lagt upp til fýra mál og átt triðseinastu avlevering einaferð. Við øðrum orðum hevur hann 55,2 minuttir um hvørt málstig. Samanbera vit við Jóannes Bjartalíð og Patrik Johannesen, so er Torbjørn effektivast.
Avgjørdi móti HB
Torbjørn Grytten kom inn í seinna hálvleiki móti HB, tá støðan var 1-1. Fyrst fekk hann eitt brotsspark og móti endanum skoraði hann til endaliga úrslitið 3-1.
- Vit fingu kontramøguleikar og uppá tveir slíkar skoraðu vit. Eg havi verið nógv skaddur, men hinir norsku leikararnir hava hjálpt mær væl at hildið mótinum uppi. Men nú vóni eg at vera frískur og kunna hjálpa liðnum. Tað hevur gingið okay, tá eg havi spælt. Men hetta var mín størsta løta í KÍ. Nú verður endaspurturin spennandi, segði Torbjørn Grytten við Norðlýsið eftir dystin.