Páll A. Klettskarð heldur fram hjá føroyameistarunum
Hansara mál í endaspurtinum í landskappingini gjørdu sítt til, at KÍ vann føroyameistaraheitið 2019.
Páll kom aftur til KÍ í summar. Eftir eina heldur trupla byrjan byrjaði hann at raka formin júst, tá brúk var fyri tí í endaspurtinum. Páll skoraði tilsamans seks mál, harav fimm móti topp 5 liðunum. M.a. vóru málini móti NSÍ (báðar dystirnar), Víkingi og til seinast B36 sera týdningarmikil.
Páll hevur ongan sáttmála havt fyri 2020 og tí hevur tað ikki verið greitt, hvar hann fór at spæla í 2020. Men í kvøld boðar KÍ frá, at Páll hevur gjørt sáttmála fyri 2020 við føroyameistararnar.
Leggjast kann afturat, at sambært FaroeSoccer hevur 29 ára gamli Páll A. Klettskarð skorað 111 mál fyri KÍ í bestu deildini. Hann manglar sostatt at skora 11 mál fyri at blíva leikarin, sum hevur skorað flest mál í søguni hjá KÍ.