Tjóðbankin: Ferðavinnan vaksandi týdning
Í greining av búskapinum vísir Tjóðbankin á, at vøksturin í ferðavinnuni fjøltáttar føroyska búskapin.
Ferðavinnan hevur verið í stórari framgongd tey seinnu árini, tí er føroyskur útflutningur vorðin eitt sindur meira fjølbroyttur. Framgongdin sæst í øktum ferðafólkastreymi á flogvøllinum, og í fleiri størvum innan hotell- og matvøruvinnuna.
Talið á gistingum á hotellum, gistningarhúsum o.ø. er økt við 40 prosentum síðan 2013. Harafturat kemur útleiga av privatum heimum ígjøgnum t.d. Airbnb umframt árin á aðrar vinnugreinar. At Føroyar eru vorðnar vælumtóktari sum ferðamál hevur ført við sær hægri nýtslustig á hotellunum kring landið. Tí eru fleiri nýggj hotell í gerð, m.a. í Tórshavn. Hagstova Føroya metir, at parturin hjá ferðavinnuni í bruttovirðisøkingini, er øktur frá 1,4 prosentum í 2011 til 2,1 prosent í 2017. Til samanberingar er parturin hjá alivinnuni og fiskivinnuni av samlaðu virðisøkingini áleið 17%.