Vindur og aftur vindur
Tað hevur verið nógvur vindur í nátt. Fyri tað mesta hevur verið talan um sera óstøðugan vind. Miðalvindurin hevur verið um 15m/s, men hvirlurnar hava verið bæði 2 og 3 ferðir miðalvindin.
Í morgun er vindurin minkaður heilt fitt. Seinnapartin er hann aftur vaksin – miðalvindurin er komin upp ímóti 20 m/s (klokkan 1700).
Tað er eitt lágtrýst, sum er statt 4-500 fjórðingar norðan fyri Føroyar, sum stendur fyri veðrinum í dag og í morgin. Tað er sera djúpt – 941hPa í miðjuni. Tað ferðast eystureftir og fer at geva normonnum illveður í morgin.
Leygarmorgun er aftur friður – gott veður langt út á seinnapartin. Men so kemur tað næsta lágtrýstið, og tað fer at halda somu kós og ferð, og tað fer eisini at vera djúpt. Soleiðis fer veðrið at endurtaka seg sunnudagin og mánadagin.
Í kvøld fer vindurin at veksa eitt sindur afturat – eini 18 til 23 m/s í miðalvindi av vestri og útnyrðingi-vestri. Hvirlurnar nakað væl harðari.
Eftir midnátt minkar vindurin. Fyrrapartin í morgin veksur aftur upp í 13 til 18 m/s.
Leygarnátt og -morgun fer at minka niður í 5 m/s og minni enn tað. Seint seinnapartin leygardagin ella tíðliga um kvøldið fer aftur at veksa.