Sunda kommuna 15 ár
Tann 1. januar 2020 vóru liðin 15 ár síðan tær 6 kommununar í Streymoynni og Eysturoynni løgdu saman í eina størri kommunu.
Sunda kommuna er úrslitið av einum samstarvi millum kommunurnar í mong ár. Talan var tá um Hósvíkar-, Hvalvíkar-, Haldórsvíkar- Gjáar -, Saksunar og Sunda kommunur. Hetta samstarv var skipað í einum kommunufelagsskapi, men í 2003 varð hildið, at tíðin var búgvin at leggja saman í eina felags kommunu. Við fólkaatkvøðu í øllum bygdum var uppskotið um samanlegging samtykt, og 1. januar 2005 fór nýggja kommunan til verka.
Hetta var, og er fyrstu ferð, at 6 kommunur í Føroyum hava lagt saman sjálvboðið sama dato.
At sunda kommuna fyllir 15 ár í ár kemur at síggjast aftur í tiltøkum og virksemi hjá kommununi í 2020.
Fólkatalið
Tá kommunurnar løgdu saman 1. januar 2005 var samlaða fólkatalið í bygdunum 1.557. Nú 15 ár seinni er fólkatalið 1.806. Vøksturin er 249 fólk ella 16%. Hetta kann samanberast við ein vøkstur fyri alt landið uppá 8%.
Vøksturin kann býtast sundur í nettotilflyting og burðaravlop. Nettotilflytingin var 94 fólk og burðaravlopið var 155.
Hyggja vit eftir broytingunum í einstøku bygdunum sæst, at gongdin er tann sama sum í øðrum pørtum av landinum – at smærri bygdirnar minka, meðan tær størru sum liggja tættari miðstaðarøkinum vaksa.