Óli M. Lassen, formaður í teknisku nevnd, sigur at borgarar í umhvørvinum hava vent sær til kommununa við einum ynski um, at vegurin verður asfalteraður. Kommunan valdi í 2019, at ganga hesum ynski á møti, men orsakað av trupulleikum hjá asfaltveitara er arbeiðið ikki framt fyrr enn nú.

- Vegastrekkið hevur í longri tíð verið merkt av hesum, tí trupult hevur verið at hildið vegin slættan, tí fegnist eg um, at hetta arbeiðið nú er framt, sigur Óli M. Lassen, ið eisini vísir á, at fleiri vegastrekkir verða asfalteraði seinni í vár, ella so skjótt veðrið loyvir tí.

Nógv virksemi er kring Másheyg í sambandi við, at nýggj rennibreyt verður gjørd á ítróttarøkinum, og harumframt hevur býráðið samtykt at dagføra vegin, sum gongur til sethúsini omanfyri rennibreytina.

Vegurin, ið einki navn hevur havt, fekk fyri kortum nýtt navn, og verður í dag kallaður “við Másheyg”.