Lýsing
Knúkur omanfyri Múla við útsikt á Viðareiði | Mynd: Pól Sundskarð

Michelin í Múla?

SKRIVAÐ: Jóhann Lützen  |  08.03.2020 - 10:30 Leiðarin Mentan Vinna

Reiðaríið Christian í Grótinum er í fullari ferð at keypa seg inn í matstovu- og hotellbransjuna. Samstundis er mótstøðan ímóti matstovuni Koks í Tórshavnar Kommunu so hørð, at tvífalda og grønstjørnaða Michelin-matstovan reikar at kalla friðleys millum bygdir í Suðurstreymoy uttan at vera vælkomin nakrastaðni.

Fyri fáum árum síðani fór Varðin í Gøtu inn í byggibransjuna, og fyri stuttum keypti hann eisini ein íbúðarblokk í Havn. Og nú meldar stóra reiðaríið í Klaksvík seg á banan og ætlar at vera bæði ein rávøru-, ídnaðar- og tænastufyritøka. Ikki bara eigur Christian í Grótinum 20% í nýggja hotellinum í Klaksvík, fyritøkan hevur júst keypt 9% av Gist & Vist, og tað ljóðar líka vist, at Christian í Grótinum fer eftir at eiga 21% av samtakinum.

Gastronomiska plettskotið hjá Gist & Vist hevur rikið víða um heimskortinum. Eftir at matstovan flutti av Hotel Føroyum hevur hon verið í Salzburg í Eysturríki, Keypmannahavn, Kirkjubø og seinastu tíðina frammi við Gjónna í Leynum. Ætlanin var síðani at flyta til Syðradal (S), men tann ætlanin er komin uppá tvørs av ætlanunum um ein køst, ið skal liggja á sama stað.

Í skrivandi stund er ikki líkt til, at pláss er fyri bæði køsti og Koks á sama plássi, eins og ivi er reistur um, hvussu væl hesar báðar verkætlanirnar komplementera hvørja aðra. Mest sannlíkt er tí, at annar parturin má velja aðra staðseting. Spurningurin er tí, um nýggi partaeigarin ikki fer at bjóða Michelinmatstovuni til Norðoyggjar. Stutt hevði í øllum føri verið frá rávøru til borðisk.

At havt hana á nýggja hotellinum hjá sama alsektorfevnandi partaeigara er sjálvsagt tað mest virkisbúskaparligt upplagda, serliga tí til hevði borið at stokt fisk, ið var landaður eitt korter frammanundan. Hinvegin livir staðsetingin mitt í einum miðbýi neyvan reiðiliga upp til kravið til ráa og óspilta náttúruvakra umhvørvið, sum restin av Gist og Vist setir.

Tað skortar tó ikki uppá náttúruvøkur øki í Norðoyggjum, og skal tað vera landfast, er perlan norðantil á Borðoynni, Múla, framúr væl egnað. Umframt stavrímið er góð útsikt til bæði Norðhavið og Viðareiði, eins og rávøran er beint við dyrnar. Er tað hinvegin ikki so týðandi við tí landfasta, kann matstovan gera sær dælt av kombineraðu Kópakonu- og 007-brandingini av Kallsoynni og fáa innivist í Mikladali, hvørs navn ikki minnir sørt um Michelin.

Í Norðoyggjum er vandin fyri at verða rikin burtur av flugufiskarum og bóndum munandi minni enn í Streymoynni. Tey sum troyta kombikkstovnarnar í ánni við Avhaldshúsið í Mikladali skulu sjálvsagt spyrjast, men síggja ivaleyst møguleikarnar fyri at avseta sína rávøru til matstovuna. Og redaktiónini kunnugt eru í løtuni heldur ongar ætlanir um at annleggja nýggjar køstar í Norðoyggjum.

Í Kallsoynni er eisini ein Syðradalur, so um matstovan longu hevur fingið prentað síni menukort, er ikki neyðugt at lata nýggj gera.

Møguleikarnir eru mangir í Norðoyggjum, og í  øllum førum skal matstovan vera vælkomin í Norðoyggjum, skuldi tað víst seg, at Tórshavnar kommuna vendir tumlinum niður til staðsetingina við Fossdalsgjógv.

Lýsing
Seinastu tíðindini
Lívið er ein lítil løta
Kanska onkur syngur við og onkur murrar
Konsertin við James Blunt er flutt
Ískoyti til kjaki um Svínoynna
Keðiligt at vit ikki kunnu hittast
Paulus, Korona, fjarstøða og páskir – ei…
Fólka­kirkjan fram til 10. mai 2020
Seinasta samdøgrið er eingin staðfestur…
Skúlin verður liðugur áðrenn summarfríti…
Skírishósdagur - andakt
Klakkur á veg yvir til Eystur­grønlands
Korona hevur ávirka okkum nógv
Koronatiltøk­ini í Almanna­verki­num linka…
Ingibjørg tulkar Janus Djurhuus
10. hvør føroyingur er nú kannaður
Eingin persónur staðfestur smittaður sei…
Korona-vegleiðing ávegis
Eiðis kommuna skipar fyri netbingo
Tøk lestrarpláss
Liviligar loysnir í avmarkingunum