Grannahjálp – eitt munadygt átak
Klaksvíkingurin Jóhannes Miðskarð hevur byrjað ein trend, sum nú breiðir seg um alt landið, har grannaløg taka virtuelt lógvatak og veita hvørjum øðrum eina virtuella hjálpandi hond. Hetta er serliga ætlað teimum, sum eru sett í sóttarhald ella eru farin í sjálvboðið sóttarhald vegna Covid-19-smittuna.
Í stuttum snýr tað seg um forum á Facebook, har grannar í grannaløgum gerast limir, og so verður skrivað í bólkin, um onkrum tørvar okkurt. Í Klaksvík er bólkur gjørdur, sum í skrivandi løtu hevur 1.240 limir. Spyrjast kann um alt, men sum dømi kann nevnast, at ein sum er settur í sóttarhald heitir á ein í grannalagnum um at gera eitthvørt ørindi fyri seg, til dømis ganga túr við hundinum ella fer til handils.
Tað hevur sínar avmarkingar at sita í sóttarhaldi, og har sum Grannahjálp er komin upp at koyra, tykjast øll taka væl ímóti henni. Sjálvandi skal man vísa varsemi, og tá eitt nú skal keypast inn, verða vørurnar stillaðar uttanfyri hjá tí, ið skal hava tær, og so avtala grannin og tann í sóttarhaldi sínámillum, hvussu farast skal fram við gjalding.
Á bólkunum útveksla liminir telefonnummur og teldupostbústaðir, og síðani verður hjálpt til eftir førimuni.
Higartil eru 4 bólkar upprættaðir, ein fyri Tórshavn-Argir-Hoyvík, ein fyri Vágar, ein fyri Klaksvík og ein fyri Fuglafjørð íroknað Kambsdal. Allir bólkarnir hava sama logo, ið Niels Uni Dam hevur sniðgivið.