Nú norska TV2 fer at vísa føroyskan fótbólt, tí føroyska kappingin er tann fyrsta í Europa, ið byrjar eftir koronasteðgin, so er áhugin fyri føroyskum fótbólti í Noregi knappliga blivin sera stórur. Fleiri av føroysku feløgunum hava fingið fjepparafeløg í Noregi. Og áhugin fyri KÍ er sera stórur eins og í Føroyum, kanska tann størsti av øllum í Noregi. Fyrr í vikuni bleiv ein norskur fjepparabólkur hjá KÍ stovnaður á facebook og í dag, hósdag kl. 11.02, eru longu 728 limir í honum, næstan allir hesir fyrstu 728 eru norskir limir. Nú fara kanska nógvir norðoyingar uppí bólkin, men av hesum fyrstu 728 limunum, so vóru bara fýra føroyingar, so hetta er ein bólkur sum nærum bara hevur norskar limir av uppruna. 

At KÍ er so vælumtókt í Noregi er neyvan tilvildarligt. KÍ hevur stolta søgu bæði heima og í Europa og er eisini verandi føroyameistari. Tað telir neyvan heldur niður, at kvinnuliðið eigur heimsmetið við 17 meistaraheitum á rað. KÍ er eisini tað føroyska felagið, ið hevur havt flestar norskar leikarar gjøgnum tíðina. Einasti norski leikarin í deildini í 2020 spælir eisini við KÍ. Eisini hava fleiri leikarar, ið eru uppaldir í KÍ, spælt í norskum fótbólti. 

Í bólkinum er nógv virksemi og longu nú verður tosað um at gera ein fjepparatúr til Klaksvíkar, tá tað ber til.

Klaksvikar Supporter Club Norway finst HER