Anskar Hansen, málarameistari hevur verið undangongumaður fyri at fáa eitt sokallað "bátatreff" í Klaksvík, hóast Summarfestiválurin í Klaksvík 2020 er avlýstur.

Anskar Hansen sigur við Norðlýsið, at hann nú í longri tíð hevur væntað at Summarfestiválurin 2020 fór at vera avlýstur, tí hevur hann arbeitt við hugskotinum um at hava "bátatreffið" ið plagar at vera á summarfestiválinum, hóast ongin Summarfestiválur verður.

Eg havi fingið øll loyvir upp á pláss, sigur Anskar. Loyvi er komið frá millum øðrum Klaksvíkar Kommunu, Klaksvíkar Havn og Koronaráðgevingini.

Tað verður Norðoya Kunningarstova, ið kemur at taka sær av samskipanini saman við Norðoya Bjargingarfelag og avlop av "bátatreffinum" fer beinleiðis til Norðoya Bjargingarfelag.

Eg og kona mín hava luttikið á nógvum bátastevnum, og vit hava hildið, at man saktans kann skipa fyri einum "bátatreffi" her í Klaksvík hóast ongin Summarfestivalur er í ár. Umstøðurnar her eru sera góðar og við á "treffinum" arbeiða vit við at skipa fyri einum "syngið við" tiltaki og eitt nú  einum grill-tiltaki, men tað fara vit at koyra meira út um seinni. 

Ein samskipanarfundur verður seinni í dag, har teir felagsskapir, ið eru vanir at skipa hetta tiltakið á Summarfestiválinum allir vera við.