Svenskt munnspray kann basa Coronasmittu
Svenska fyritøkan Enzymatica hevur ment eitt munnspray ímóti Corona, og royndarúrslitini eru so mikið góð, at partabrævið í fyritøkuni fer sendandi uppeftir á keypsskálanum í Stockholm. Enzymatica-partabrævið er farið upp við 76,3% eftir at fyritøkan skrivaði, at teirra munnspray, ið nevnist ColdZyme, ger SARS-CoV-2 98,3% minni virkið.
ColdZyme er eitt munnspray, sum byggir ein verjugarð í munninum ímóti krím-virusi. Tað inniheldur í høvuðsheitum glycerol og trypsin-enzymið úr toski. Endamálið við kanningini var at greina, hvussu sprayið viðvirkaði til at minka um Coronasmittuna, og fyritøkan upplýsir, at ColdZyme óvirkjar (”deaktiverar”) SARS CoV-2 við 98,3% í 20 minuttir.
Tað var góðkenda amerikanska felagið Microbac Labratories, sum stóð fyri kanningini, og eftir øllum at døma eru ongi álvarsom hjáárin.
Rakstrarleiðarin í Enzymatica, Claus Egstrand, sigur, at hóast úrslitini ikki beinleiðis kunnu førast yvir á kliniskan virknað, er tað sera áhugavert, at ColdZyme kann óvirkja SARS-CoV-2. Við støði í kanningarúrslitunum er tað rímiligt at ganga út frá, at ColdZyme kann bjóða ein ”verjugarð”. Úrslitini boða frá góðum og kunnu takast víðari við inn í klinskar kanningar, sigur Claus Egstrand.
Kelda:
https://finansavisen.no/nyheter/helse/2020/07/20/7548841/svensk-munnspray-tar-knekken-pa-corona-aksjen-rykker-til