Cassiopeia farin úr Norðhavnini
Mikil orðadráttur hevur verið um skipini, sum hava ligið í Norðhavnini seinastu dagarnar. Fyrst var tað fiskiskipið Karelia, har 23 mans vórðu smittaðir við Corona, og tveir av teimum eru innlagdir á Landssjúkrahúsinum. Síðani var tað trolarin Yantarnij, ið fór, og í dag er farmaskipið Cassiopeia so eisini farið úr Norðhavnini.
Umborð á Cassiopeia eru 23 mans, og av teimum eru, so vítt vit vita, 11 mans smittaðir við Corona – 6 ólavsøkuaftan og kl. 10 í morgun vóru so 5 smittaðir afturat. Cassiopeia siglir við farmi, og skuldi eftir ætlan til Afrika. Landslæknin hevur mælt teimum frá at fara hagar, men tá skipið er farið út um føroyskt sjóøki gera skipari og reiðarí sjálvi av, hvat teir gera. Ein møguleiki er, at skipið setir kós, men bíðar við at fara inn í havn, til allir menninir eru vorðnir frískir aftur.
Fyrr í dag visti Kringvarpið annars at siga, at Cassiopeia skuldi liggja í Norðhavnini til í morgin, men nú hevur skipið so loyst frá kai. Tá skuldu boð koma frá reiðarínum um, hvussu farast skuldi fram. Møguliga eru tey boðini longu komin.
Yantarnij og Karelia vórðu russisk, og Cassiopeia er eitt litaviskt skip.