Longu tann 17. desember í 2014 leggur Poul Michelsen, tingmaður fyri Framsókn, sum eisini tá sat í andstøðu, fram eitt uppskot til samtyktar um “um at leggja ognarrættin, raksturin og

umsitingina av almenna fjarskiftiskervinum í eitt sjálvstøðugt alment felag”. Hetta er ikki í sær sjálvum eitt einskiljingaruppskot, men í viðmerkingunum stendur:

“Um landsstýrið einaferð ætlar at einskilja Føroya Tele, eru flestu serfrøðingar samdir um, at landið ikki skal selja virksemið í FT Net eisini, men varðveita virksemið í einum almennum felag. Skilvísið í hesum er, at eitt privat monopol er munandi verri fyri kappingina enn eitt alment monopol.

Við at leggja ognarrættin, raksturin og umsitingina av almenna fjarskiftiskervinum í eitt sjálvstøðugt alment felag, er sostatt eisini klárt at einskilja Føroya Tele, um og tá tað skuldi verðið aktuelt.

Víst verður annars til hjálagda skriv frá Vodafone og Elektron til Kappingarráðið tann 20. desember 2010.”

 

Hetta varð so ikki samtykt. Men fýra ár seinni er Poul Michelsen vinnumálaráðharri, og tann 13. apríl boðar hann frá, at “Nú verður fyrsta stigið tikið til at skilja FT Net frá Føroya Tele.”, og ein partur av teimum broytingunum er neyvt tann sama, sum fekk stjóran í felagnum at leggja frá sær fríggjadagin í farnu viku, nevniliga at stjórin í Føroya Tele ikki longur skuldi vera nevndarformaður í FT-Net.

Vágaportalurin skrivar eisini í kvøld, at tað sum Poul Michelsen, táverandi vinnumálaráðharri, segði tann 13. apríl, samsvarar sera illa við tað, sum Høgni Hoydal segði í kjakinum í Degi og viku í kvøld. Tí bæði ætlanirnar um at skilja netpartin frá Føroya Tele, og tað ikki longur lata stjóran í Føroya Tele vera nevndarformann í FT-Net, eru nakað, sum bæði hendan og undanfarna samgonga hava verið samd um.

Kelda og video: Nú verður fyrsta stigið tikið til at skilja FT Net frá Føroya Tele.