KÍ slapp við skrekkinum á Skála
KÍ hevði stórar trupulleikar við at vinna móti botnliðnum Skála.
KÍ er oddalið eftir kvøldsins dyst á Skála. Men tað var alt annað enn lætt, tí KÍ skuldi stríðast fyri at fáa trý stig. Ikki tí, KÍ var samanlagt betra liðið og hevði teir stóru málmøguleikarnar, men í mun til støðið síðstu vikurnar, so var hetta kanska lakasta avrikið hjá KÍ síðani 6-2 tapið móti B36. Nógvir leikarar høvdu tað sera trupult og tað kann skyldast, at bara tríggir dagar eru frá harða dystinum móti HB, tí tað er ikki vanligt fyri føroysk lið. KÍ hevði tó fleiri frískar leikarar frá byrjan, ið ikki spældu stórvegis seinast. Harímillum fleiri, sum ikki hava spælt dystir í longri tíð, og tað kann eisini hava havt sína ávirkan. Harafturat skal sigast, at Skála spældi ein góðan dyst í verjupartinum og legði nógv fyri dagin soleiðis, at KÍ hevði tað sera trupult gjøgnum nærum allan dystin.Skála fekk hildið spenninginum allan vegin og síðstu løtuna manglaði ikki so nógv í, at onkur stórur málmøguleiki kom burturúr.
KÍ sigursmálið kom í seinna hálvleiki eftir eitt frísparksinnlegg frá Jóannes Bjartalíð, sum Deni Pavlovic skallaði í málið. Tætt er millum dystirnar hjá KÍ, tí longu leygardagin er aftur dystur, tá KÍ møtir TB á útivølli. Eitt mótstøðulið, sum tvær ferðir fyrr í ár hevur verið nær við at fingið stig móti KÍ.