Útstykking á Fossum bíðar eftir Statens Luftfartsvæsen
Ein útstykking uppi á Fossum í Klaksvík er endað í bureaukratinum hjá loftferðslumyndugleikunum. Harley Joensen, ið stendur fyri byggileiðsluni, sigur tó við Kringvarpið, at hetta ikki seinkar verkætlanini stórvegis, tí tey hava nóg mikið at gera, meðan tey bíða eftir svari frá Statens Luftfartsvæsen, og tað arbeiðið verður gjørt í millumbilinum.
Tann 18. juni varð spakin settur í verkætlanina uppi á Fossum, og verkætlanin fevnir um heili 91 grundstykkir, ið skulu gerast í trimum byggistigum. Men stígur er komin í viðvíkjandi avgrevstrinum. Talan er um, at vegurin, har ætlanin er at tyrva avgrevsturin, liggur ov tætt við tyrlupallin í Klaksvík, og tá tyrvast skal so nær við tyrlupall, krevst loyvi frá loftferðslumyndugleikunum, og hetta loyvið er ikki fingið til vega enn. Sostatt slepst ikki av við avgrevsturin í løtuni.
Tað eru jarðareigararnir, ið hava kravt, at tyrvt verður aðrastaðni. Upprunaliga lá tyrvingarvegurin eitt annað stað, ið var nóg langt burturi frá tyrlupallinum, til at tyrvast kundi har uttan loyvi. Eftir røttum skuldi Statens Luftfartsvæsen havt svarað í seinastu vikuni, so Harley Joensen væntar, at svarið man fara at koma í hesi vikuni. Meðan bíðað verður eftir tí, gera teir onnur arbeiði viðvíkjandi útstykkingini, og so má avgrevsturin bara bíða.