Andstøðuflokkarnir arbeiða í løtuni við einum uppskoti, ið skal síðustilla samkynd foreldur við hinskynd foreldur í barsilsskipanini. Hetta merkir, at samkynd foreldur skulu fáa sama rætt til barsil, og sum skilst er uppskotið á trappunum. Møguliga kemur tað longu í komandi viku. Og eitt, sum ger hetta uppskotið til nakað serligt er, at tað er ein møguleiki fyri, at tað verður samtykt. Nakað, sum uttan iva setir løgmanni grá hár í høvdið.

Samgongan er nevniliga komin í rættiligt rasshaft av hesum, serliga Sambandsflokkurin. Teir meira frísinnaðu politikararnir í miðstaðarøkinum, Johan Dahl og Kaj Leo Johannesen, hava alment lýst sín stuðul til eina tílíka javnseting av samkyndum og hinskyndum. Johan Dahl hevur alment lovað at atkvøtt fyri. Hetta hevur fingið Bill Justinussen úr Miðflokkinum til tastarnar, har hann skrivar, at so er ongin samgonga. Og í dag sigur Jenis av Rana, formaður í Miðflokkinum, nakað tað sama.

Hetta dilemmað í samgonguni kemur, sum vera man, sera væl við hjá andstøðuni, og ger sjálvsagt ikki teirra hug til at leggja uppskotið fram verri. Tað er innanfyri hugsjónina hjá Framsókn og lutvíst hjá Tjóðveldi og Javnaðarflokkinum at síðustilla samkynd og hinskynd, og tá tey samstundis fáa høvi at vinna samgonguni neisir og spæla tingfólkini í henni út ímóti hvørjum øðrum, so leggjast tey ikki á boðini.

Spurningurin er so, hvussu samgongan reagerar. Har eru fleiri møguleikar. Løgmaður kann lova øðrum av pørtunum okkurt afturfyri at bakka, til dømis í fíggjarlógini, ella við einum øðrum, meira semjusøkjandi, uppskoti um at broyta Barsilsskipanina. Skal Miðflokkurin bakka, er tað greitt, at hann fer at seta stór krøv afturfyri. Flokkurin hevur longu bakkað tvær ferðir, og er nú komin at pínumarkinum fyri, hvussu nógvar kamelar hann megnar at svølgja. So tað er heilt ósannlíkt, at Miðflokkurin letur hetta málið koma ígjøgnum og kortini verða verandi í samgonguni. Møguleikin er har, men hann er evarska lítil.

Ivasamt er, hvussu langt málið og ikki minst avleiðingarnar av tí koma. Í ytstu konsekvens kann tað føra til samgonguslit. Tá hevur løgmaður ein lítlan møguleika, ið er at vita, um Sjálvstýrið er áhugað í at pasifisera Johan Dahl. Sjálvstýri hevur higartil verið ein stuðulsflokkur hjá samgonguni og gevur henni harvið 18 tingfólk. Kaj Leo Johannesen er í landsstýrinum, ikki í Løgtinginum, so hann fær ikki atkvøtt í málinum.

Men óansæð hvat, so má samgongan annaðhvørt loysa málið nú í heyst, ella eisini liva við eini konstantari hóttan øll tey komandi 3 árini. Tí tað er heilt víst, at andstøðan ikki fer at bakka.