Eftir góða umhugsanartíð kennist hetta væl og  rætt. Tí eg føli, at eg havi nógv uppá hjartað. Hugskotini og viljin at fremja nakað gott og vera við til at mynda heimstaðin, býr djúpt í mær. So nú eri eg til reiðar, og vónandi kann eg eisini gera mun.

Men hvør eri eg?
Eg eiti Annika Steintórsdóttir Biskopstø. Eri 33 ára gomul og búsitandi úti í Grótinum í Klaksvík saman við manni mínum Hera Schwartz Jacobsen og børnunum Tóri Schwartz og Røskvu Lý, sum eru 5 og 2 ára gomul.

Eg havi lisið sálarfrøði og mentan. Í míni serritgerð skrivaði eg um sjómansmentan og familjulív. Í dag undirvísi eg á Tekniska Skúla í Klaksvík og á Miðnámi á Kambsdali.

Við lív og sál
Sjálv havi eg verið virkin og tikið lut í nógvum tiltøkum innan mentan og umhvørvi. Eg havi m.a. skipað fyri barnalandi á Summarfestivalinum, Jólabýnum í Klaksvík, LIVA og Lív í býnum, umhvørvisátøkunum hjá Slóða fyri, mat- og sølutorgi við bátabrúgvarnar og ymiskt annað Klaksvík og Norðoyggjum at frama. Eisini havi eg virkað sum sjálvboðin á Lívslinjuni, sum er ein telefonlinja til kreppurakt og fingist við útvarp, barna- og ungdómsarbeiði, umframt miðlan og íverksetan av ymiskum slag. 

Eg eri opin og samstarvssinnað og fari eldhugað til verka. Eg havi tikið mítt val.

Annika Steintórsdóttir Biskopstø
Valevni fyri Norðoya Tjóðveldisfelag