Í okkara ungu finst ein lívsneisti, eitt áræði og kæti, sum eigur at verða virt, stimbrað og ment. Norðoya ungdómur skal mennast og nørast í einum kveikjandi, góðum og undirhaldandi ungdómsumhvørvi fyri øll, í Klaksvík.

Í løtuni hava vit fleiri tilboð til teirra ungu. Eitt gott ungdómshús, frítíðar- og itrottarfeløg, kvøldskúla av ymiskum slag o.a., men ein stórur partur av okkara ungdómi leitar sær aðrastaðni til ymiskt í vikuskiftunum og um kvøldarnar.

Um eg veri valdur í býráði á valdegnum í morgin, so fari eg at arbeiða fyri at menna enn fleiri tilboð til okkara ungdóm, soleiðis at ungdómurin hevur støð at savnast bæði mitt í viku og í vikuskiftinum. Kommunan verður viðspælari at nøra eitt ungdómsumhvørvi og náttarlív til øll, bæði mitt í viku og somuleiðis um vikuskiftini.

Um okkara ungdómur kennir seg virdan, hoyrdan og hevur góð minnir við sær, um ein blómandi ungdómstrivnað í Klaksvík, so eru útlit fyri, at hesi venda aftur júst á hendan stað seinni í lívinum, við vón um júst sama ungdómstrivnað, sum tey vuksu upp í!

Tí ungdómurin myndar okkum framtíðina!

X við meg á lista E

Anfinn Hansen, valevni fyri Norðoya Tjóðveldisfelag