Í dag hava flestu bátarnir her verið sunnanfyri. Líðhamar hevur 8.000 pund, Dalsenni 6.400 pund og Stakkavík 6.600 pund. Brandur hevur ikki verið úti í dag, men í gjár hevði hann 10.600 pund eins og Líðhamar hevði 10.200 pund eisini í gjár.

Janus Sørensen, formaður á Brandi sigur, at teir hava fiska 50.000 pund í ár. Prísurin hevur ikki verið á hægsta støði, Men tað ber til, tí tað er somikið at fáa. Í gjár høvdu vit 4.500 pund av toski, tað munar so væl. Annars var væl av smáum toski uppi í í gjár, tað hava vit ikki sæð so nógv til fyrr enn nú.

Norðlýsið hevur ikki fingið fatur á Bragd, teir eru vestanfyri í Vágahavinum.

Kallanes er eisini sunnanfyri. Teir vóru ikki á Fiskamarknaðinum í morgun, men vit ringdu fyri løtu síðani umborð til skiparan Kára Klettskarð í Kongsstovu. Hann sigur, at teir hava 8.000 pund í dag og av tí eini 2.000 pund av toski.

Fyri løtu síðani fingu vit samband við Bragd. Oddmar Niclasen, skipari sigur, at teir hava verið vestanfyri í dag og í gjár. Í dag hava vit góð 11.000 pund og eini 3.000 pund av toski, í gjár høvdu vit 13.000 pund og nakað tað sama av toski, sum í gjár. Her í Vágahavinum hevur verið nakað av millumfiski, ímeðan tá vit vóru norðanfyri var antin stóru toskur at fáa ella "fýrarir". Tá vit tosaðu við Oddmar um 14.15 tíðina segði hann at nú øtlaði hann veðrið vestanfyri.