Síggj heimsmeistaramyndatøkuna, skiparin á ”Ivalo Arctica” hevur tikið
Her er vinnaramyndin frá tí donsk- og norðurlendsku myndakappingini fyri útisiglarar.
Netblaðið, Søfart, boðar frá, at vinnari í 2020, er skipsførarin, Jóan Jákup Torbjarnarson á ”Ivalo Arctica”.
Heitið á myndini er ”Ivalo Arctica ávegis inn í Kangerlussuaq”. Myndin hevur høga myndagóðsku og er hvøss við góðum litsamansetingum, ið gagna myndini. Tað sjálvsama ljóðið kemur helst frá innlandsísinum inni á botni á fjørðinum, halda myndadómarnir.
Kompositiónin líkist tí klassiska perfekta við speglingum, linjum, forgrund og bakgrund, sigur metingarnevndin.
1. virðisløn er eitt gávukort á kr. 5.000,-, sum er latið av Den Danske Maritime Fond.
Lagt verður afturat, at aftur í ár hava mangir sjófarar á donskum skipum luttikið við hópin av vøkrum myndum. 46 sjófólk hava sent inn heili 221 myndir til Sea Health & Welfare’s, sum skipar fyri myndakappingini, ið hevur nógv ár á baki – Kappingin hevur verið heilt síðani 1951.
Vinnarin í 2020 var, sum áður sagt, Jóan Jákup Torbjarnarson, sum hesa ferð, myndin varð tikið, eltið leiðirnar, pápi hansara, Torbjørn Jacobsen (borgarstjóri í Runavíkar kommunu) fyrr plagdi at sigla.