Grækarismessa nærkast, og tá siga vit at tjøldrini koma. Men tað er sjálvandi ymiskt sum tey koma til landið. Sjálvur havi eg aftur í ár koyrt út á Oyrar at vita nær tjøldrini koma har. Onki havi eg sæð fyrr enn í morgun, tá eg sá trý, men fólk, sum búgva har søgd mær, at tey hava sæð tjaldur í umleið eina viku. Fyri góðum mánaði síðani var eitt at síggja á Strond, men møguliga hevur tað verið her allan vetur. Suðuri á landi munnu vera eini 14 dagar síðani at tey fyrstu sóust.

Men tað sær út til at talið av tjøldrum veksur ikki, heldur er tað hin vegin. Í fjørð og fyrraárið undraðist eg á hvussu fá tjøldur sóust tá eg ferðaðist kring um í hagum ymsastaðni í Føroyum, tí verður eitt sindur spennandi at síggja hvussu gongdin verður í ár.

Men tey fáu, ið koma fegnast vit um og fara at ynskja teimum vælkomin á Grækarismessu, helst verða tey fleiri tá.