KÍ vitjar á Svangaskarði til landskappingardyst á fyrsta sinni síðani 2016. B68 er uppflytari og saman við 07 Vestur favorittur at enda á teimum báðum aftastu plássunum, meðan KÍ saman við HB er størsti favoritturin at vinna FM. Tí er KÍ eisini stórfavorittur til dagsins dyst.

Hjá B68 fara vit m.a. at síggja tann royna Lukasz Cieslewicz í álopinum. Hann spælir á fyrsta sinni við B68. B68 hevur tríggjar útlendskar leikarar, men hevur annars ein hóp, sum í stóran mun er mannaður við ungum lokalum leikarum.

Hjá KÍ eru tveir leikarar skaddir, sum eru Jesper Brinck og Ivar S. Rønning. Hvørgin hevur spælt nakran venjingardyst, men gongst eftir ætlan, so vera báðir skjótt tøkir. Dávid Langgaard er ivasamur vegna skaða. Hjá KÍ vera fleiri leikarar, ið fara at spæla sín fyrsta dyst fyri felagið. Árni Frederiksberg, Claes Kronberg, Bob Sumareh, Jasper van Der Heyden, Mathias Rosenørn og Daniel Bjørkman eru væntandi allir í hópinum og fleiri av teimum væntast at fáa spælitíð.

Dysturin á Svangaskarði byrjar kl. 16.00. Dómari verður Rúni Olsen.