Til dystin hevði HB heimavøll, og tað inniber, at felagið hevur ábyrgd av vælferðini hjá leikarunum, dómarunum, øðrum við tilknýti til dystin, og eisini av, at viðhaldsfólkini sýna sømiligan atburð. Áskoðarin, ið rópti rasistisku ókvæmisorðini eftir kvinnuliga leikaranum hjá KÍ, er pápi ein av leikarunum á HB-liðnum og sat sjálvur í HB-skýlinum.

Eftir at hava hoyrt rasistisku orðini ímóti sær, ynskti KÍ-leikarin at sleppa av vøllinum, men megnaði at bíta tað í seg og spæla víðari, stendur í frágreiðingini. Venjarin hjá HB-kvinnum fór yvir til KÍ eftir dystin og bað um umbering fyri atburðin hjá áskoðaranum. Men viðmerkt verður eisini, at Havnar Bóltfelag sum felag ikki sjálvt hevur tikið nakað stig yvirfyri tí áskoðaranum, ið rópti ókvæmisorðini.

Úrskurðurin at sekta HB er gjørdur við heimild í §8c í Agareglugerðini, og víst verður til brot á §3 í Fótbóltslógini, ið setir forboð fyri rasismu í sambandi við fótbóltsdystir, og §24, stk. 2 í Fótbóltslógini, ið nevnir, at hetta eisini er galdandi fyri áskoðarar, og at felagið við heimavølli hevur skyldu til at ansa eftir hesum.

Víst verður eisini til, at bæði FIFA og UEFA hava ásetingar, ið skulu fyribyrgja rasismu, og FSF og fótbóltsfeløgini hava bundið seg til at halda tær.

Allur úrskurðurin kann lesast á https://www.fsf.fo/fsf/logir-og-reglur-2/kaeruurskurdir/kaeruurskurdir-2021/ , leinkið frá 22. juli, ið nevnist “Áskoðari sýndi rasistiskan atburð”.