Kappingarnevndin hjá FSF hevur avgjørt, at dystirnir millum B36 og Víking, og NSÍ og B36 verða spældir ávikavist 4. og 7. november.

Korona órógvar eisini Betri Deildini hjá monnum, og nú er greitt, at tað verður ikki fyrr enn sunnudagin 7. november, at stigatalvan fyri landskappingina 2021 verður endaliga uppgjørd.

Sunnudagin bleiv dysturin millum B36 og Víking avlýstur orsaka av korona í B36-hópinum. Avleiðingarnar vóru, at seks spælarar hjá árstalsfelagnum eru koyrdir í sóttarhald næstu tíggju dagarnar.

Hetta hevur við sær, at seinastu tveir landskappingardystirnir hjá B36 eru útsettir.

Kappingarnevndin hjá Fótbóltssambandi Føroya hevur avgjørt, at útsetti dysturin millum B36 og Víking verður spældur hósdagin 4. november, og dysturin í Runavík millum NSÍ og B36, sum skuldi vera komandi leygardag, er fluttur til sunnudagin 7. november.

Leygardagin 30. oktober
EB/Streymur – B68
HB – ÍF
Víkingur – KÍ
TB – 07 Vestur

Hósdagin 4. november
B36 – Víkingur

Sunnudagin 7. november
NSÍ – B36