Farið er longu út í ekstremarnar. Politikarar sunnanfyri, serliga borgarstjórin á Tvøroyri, men partvís eisini tann í Havn, stilla seg stak positivar fyri at gera ein Suðuroyartunnil fyri 5,6 milliardir. Kristin Michelsen av Tvøroyri sigur seg enntá taka undir við, at norðoyingar og vágafólk skulu rinda 70 krónur hvønn vegin í Norðoyatunlinum og Vágatunlinum fyri at fáa ráð til Suðuroyartunnilin.

Í hinum endanum av spektrinum krevja 5 lokalfeløg norðanfjørðs og vestanfyri, at Landsstýrið loksins heldur orð, við at bummgjøldini í Norðoyatunlinum og Vágatunlinum verða avtikin heilt, tunnilsfeløgini bæði niðurløgd, og tunlarnir settir á fíggjarlógina. Tey hótta við ikki at atkvøða fyri innkomuvegnum til Havnar ella Fámjinstunlinum, um bummgjøldini ikki verða tikin av.

Í løtuni er bólturin skotin út til horna. Undir 2. viðgerð í dag, týsdagin 26. oktober, blivu málini atkvødd ígjøgnum, men fíggjarmálaráðharrin, Jørgen Niclasen, noyddist at lova tingfólkum úr Vágum og Norðoyggjum ein fund um málini í morgin, mikudagin 27. oktober, og fáa tey ikki tað, tey vilja hava, er hugsandi, at tey atkvøða ímóti undir 3. viðgerð.

So er stóri spurningurin, hvat andstøðan ger. Á Løgtingi í dag spurdi Frimodt Rasmussen, tingmaður úr Norðoyggjum, Aksel V. Johannesen, formann í Javnaðarflokkinum, um hesin tók undir við at savna allar undirsjóvartunlarnar saman í eitt felag, men fekk onki greitt svar. Aksel V. Johannesen var annars stigtakari til at savna feløgini í Runavík og felags innkrevjingarskipan er eisini í gildi í dag.

Hinvegin kann andstøðan neyvan liva við at hava bjargað samgonguni. Vit hava sæð, hvat tað gjørdi við Sjálvstýrisflokkin og fyrrverandi tingmannin Magna Laksáfoss, at teir á sinni bjargaðu undanfarnu samgonguni fleiri ferðir. Formaðurin í Sjálvstýri misti høvdið til valið, og Magni Laksáfoss er at síggja til heilt liðugur í politikki eftir tað. Tí kann roknast við, at fær andstøðan eitt høvi til at fella samgonguna, so ger hon tað. Men tað er ikki vist.

Spurningur er so, um tað ber til at gera øllum til vildar. Ber til bæði at avtaka bummgjøldini í undirsjóvartunlunum norðanfyri og samstundis at gera ein undirsjóvartunnil til Suðuroy, ið kostar tað sama sum 20 tunlar Norður um Fjall, ið sera leingi vóru tað størsta stríðsmálið? Møguliga, um tað verður fíggjað yvir eitt longri áramál. Í øllum førum eigur tað at verða kannað.

Vit fara at verða nógv klókari uppá hetta komandi dagarnar, men eitt er so vist sum amen í kirkjuni: Norðoyapolitikarar kunnu á ongan hátt yvirliva at taka undir við tí fíggingarleisti, ið varð nevndur í frágreiðingini hjá Landsverki um sjeyfaldað bummgjøld. Tað kann slett ikki koma upp á tal. Og tað er rættiliga víst, at norðoyapolitikarar og vágapolitikarar heldur ofra samgonguna enn ganga við til tað.

Annars eru teir lidnir í politikki.