Jenis av Rana, formaður í Miðflokkinum, var væl skiljandi sera misnøgdur við rokaduni hjá løgmanni, at hann trekti sín stuðul til sonevndu tjóðarsemjuna um framtíð Føroya í ríkinum.

“Vit fara ikki at samstarva við ein løgmann, sum fer so langt fyri at svíkja tað ófødda barnið”, segði Jenis av Rana við Kringvarpið áðrenn tingfundin í gjár.

Tó kundi tað tykjast løgið fyri mong, at til fyrsta mál á tingfundinum eftir rokaduna, ið var málið um at seta revsitiltøk í verk móti russiskum reiðaríum, var tað bert ein úr andstøðuni, ið atkvøddu saman við samgonguni, og tað var júst Jenis av Rana.

Eisini kann tað fyri nógv vera undranarsamt, at formaðurin í Miðflokkinum velur at knýta spurningin um ríkisrættarligu støðuna uppí fosturtøkumálið. Serliga tí, at tað tykist ikki sum um, at málið um ríkisrættarligu støðu Føroya fyllir serligani nógv í politisku skipanini, og als ikki millum pøbilin.

Her kemur eitt annað mál, ið løgmaður umsitur – Suðuroyartunnilin.

Formaður Miðfloksins nevndi onki um hetta málið, tá hann segði seg ikki vilja samstarva við løgmann. Aftur her kann mann siga, at málið um fosturtøku og Suðuroyartunnil onki hava við hvørt annað at gera – og tó.

Sum Norðlýsið hevur víst á, so hevur Bjarni Hammer verið ein, ið kundi fara báðar vegir í málinum um fría fosturtøku. Hann vildi fyrst og fremst fáa vissu fyri, at Suðuroyartunnilin verður avgreiddur.

Mánakvøldið fór Bjarni Hammer so sjálvur út á Facebook og boðaði frá, at málið um Suðuroyartunnilin var borið niðan í Løgtingið. Hetta sama kvøld, sum fundurin hjá Javnaðarflokkinum var, har roynt var tosa Djóna Nolsøe Joensen uppá pláss, ið so endaði við rokaduni hjá Løgmanni.

Keldur hjá Norðlýsinum vilja vera við, at Bjarni Hammer á sama fundi fekk vissu fyri Suðuroyartunlinum, og tí kundi hann atkvøða fyri. Og her kemur so Jenis av Rana innaftur í myndina.

Trekkir Miðflokkurin stuðulin til Suðuroyartunnilin, byrjar undirtøkan fyri honum so smátt at ridla. Í miðlunum hava vit hoyrt formennirnar í Sambandsflokkinum og Fólkaflokkinum tosa um ivamál í verkætlanini, hóast teir ikki hava tikið stuðulin aftur. Byrjar fyrst onkur, so kann væntast ein dominoeffekt. Tí eisini í samgonguni eru ivasamar røddir, sum Norðlýsið skilir. Eisini her er tað Woke-brigadan, ið ynskir fosturtøkumálið framt, ið eisini ynskir forða einum møguligum Suðuroyartunli fyri at verja fuglalív og vátlendir á Sandoynni.

Fyri Bjarna Hammer vigar Suðuroyartunnilin meir enn fosturtøkumálið, meðan fyri suðuroyingin í Miðflokkinum vigar fosturtøkumálið meir enn Suðuroyartunnilin.

So síðsta skotið í byrsuni hjá Miðflokkinum er at ganga stigið við at trekkja sítt samstarv við løgmann fult út, og trekkja stuðulin til Suðuroyartunnilin, fyri at bjarga rættindunum hjá ófødda barninum.