Í viðmerkingunum til fyrispurningin stendur, at Løgtingið ger í fíggjarlógini av, hvar tær ymisku játtanirnar skulu verða brúktar. Har kann ein vansi við felags innkeypinum hjá Landssjúkrahúsinum vera, at um Landssjúkrahúsið tekur ein hægri kostnað fyri vørurnar, enn tað sjálvt hevur goldið fyri tær, so kunnu pengar á tann hátt verða tiknir frá tí øki ella stovni, ið keypir vøruna, og til Landssjúkrahúsið í Havn.

Tingmaðurin skrivar víðari í viðmerkingunum, at um pengar á tann hátt verða fluttir frá konti, sum Løgtingið hevur játtað teir til, og til felagsgoymsluna hjá Landssjúkrahúsinum, so kann tað ganga ímóti Løgtingsins vilja. Um so er, at Landssjúkrahúsið setir sín kostnað ov høgt, so undirminerar tað endamálið við felags innkeypi, og so hevði tað verið betri, um onnur í sjúkrahúsverkinum fingu fríar hendur at keypa vørurnar, har tey fingu tær bíligast.

Hetta hevði bæði spart pengar og verið meira í tráð við Løgtingsins vilja.