Norðlýsið hevur verið í samband við Maritu Sumberg. Hon staðfestir, at Viðareiðis Kommuna er partur av eldrasamstarvinum NBH. Og hon fegnast um, at tað er samtykt, at NBH í næstum fer undir tænastudepil á Viðareiði.

Búskaparfrágreiðingin frá 2019 vísti á, at við demografisku avbjóðingini krevst dirvi frá politikarum og øðrum fyri at tey, sum eldast skal verða betri fyri heilsuliga. Best amboðið í hesum høpi hevur víst seg at vera venjing. Venjingar, sum kunnu verða fyribyrgjandi á eldraøkinum.

NBH metir, at tað er ein tørvur at hava tilboð í økinum uttanfyri Klaksvík. Tí tað er ikki so einfalt hjá eldri at koyra gjøgnum tunlarnar fyri at koma til Klaksvíkar til venjing. Eldri eru truplari at flyta og við hesum tænastudeplinumkemur tilboðið nærri til borgarar eystan Múla.

Sum allar tænastur hjá NBH, so eru hesar tænasturnar ætlaðar borgarum 67+.

Tænastudepilin er ein roynd at fáa fólk at búgva heima sum longst. Depilin kemur at bjóða endurvenjing, viðlíkahaldsvenjing, fyribyrgjandi venjing og kemur eisini at hava dagtilhald, og dagtilboð.

Arbeiðið við dagtilboði er farið í gongd og verður royndarkoyrt í løtuni. Sum er verður ein skúlastova nýtt til hetta átak og nýggjar tíðarhóskandi maskinur eru keyptar til tilboðið. Men sum alt annað, hevur hetta verðið darvað og seinkað av korona, men fysioterapeutar eru so smátt farnir í gongd við einum bólki av borgarum.

Afturat dagtilboðunum nevnir Marita Sumberg, borgarstjóri á Viðareiði, at Viðareiðis kommuna kemur at byggja íbúðir, so møguleiki verður fyri døgnrehabilitering í avmarkaði tíðarskeið, 3 mánaðar á gangin.

Væntað verður, at tænastudepilin verður liðugur á heysti 2024. Nýggi bygningurin skal byggjast mitt í bygdini niðan fyri skúlan. Hann verður 400 fermetrar til støddar, er mettur at kosta 13 - 15 milliónir krónur, og eini fimm starvsfólk verða knýtt at deplinum.

Frá NBH siga tey, at farið verður undir byggibúningina í næstum, og vónar NBH at kunna bjóða sjálva byggingina út í heyst.