Nógv av bygdarfólkunum vóru møtt upp, tá tær í gulu klæðunum komu súkklandi á eyðkendu súkklunum til bygdarhúsið í Kunoy, har hugnakvøldið var. Borgarstjórin segði nøkur orð og handaði teimum blómutyssi.

Millum annað segði borgarstjórin, Poul Jacob Poulsen: Tað er ikki ofta, at vit kunnu samlast her á Kunoynni at heiðra lokalum ítróttafólki, men tað gera vit í kvøld. Hanna, Annika og Meiken hava súkklað tann langa teinin úr Føroyum til París, og tað er eitt megnar avrik, sum vit avgjørt halda er vert at heiðra. Tað er ein langur teinur at súkkla, og tað er ikki bara bara at gjøgnumføra, tá ein hugsar um alla ta venjing og fyrireiking, sum skal til gjøgnum veturin fyri at tað skal eydnast. Sum flestum kunnugt stuðlar Rynkebyliðið børnum við lívshættisligum sjúkum. Og tað eru ikki smápengar, sum samlaða liðið klárar at savna saman hvørt ár. Í 2021 var tað góðar 72 milliónir krónur. Tað tit hava avrikað, ger mun.

Eisini takkaðu tær tríggjar kommununi og bygdarfólkunum fyri stuðulin – og løgdu dent á, at hesa ferð vóru tríggjar kommunur, sum stuðaðu, og Kunoyar Kommuna var ein teirra.

Vit kunnu fegnast um allar rynkurnar og allar aðrar felagsskapir, sum gera mun fyri at hjálpa øðrum.