Eg eri ikki journalistur, advokatur, lækni ella aðrir fínir titlar. Eg haldi, at onkur má sleppa inn um tingsins gátt, sum kennir til gerandisdagin hjá vanliga borgaranum.

Eg havi siglt alt mítt lív; viðhvørt gongur tað gott og viðhvørt minni gott. Eg kenni til mótvind og viðvind.

Eg stilli ikki upp, fyri at fáa eitt arbeiði, tí arbeiði kann eg fáa í hópatali. Eg stilli upp, tí at onkur má sleppa at umboða vanliga borgaran í Føroyum. Velur tú meg, verði eg tín rødd á tingi!

Eg havi seinastu vikuna verið til valfundir og onnur stór og smá tiltøk kring landið. Eg má siga, at eina løtu ivaðist eg, hvat eg nú hevði rótað meg uppí! Tey flestu lova nógv og rópa hart (latið tykkum ikki lumpa av hesum!).

Tey tosa um tey ungu og um útbúgvingar. Eingin teirra nevnir tey av tykkum ungu, sum ikki orka skúla og ynskja, at koma út í vinnuna.

Tey bjóða trygdarskeið til 10. flokk. Sjáldan havi eg møtt einum fiskimanni/kvinnu, sum hevur 10. flokks fráfaringarroynd. Fleiri av tykkum royna at sleppa umborð á skip og verða oftani avvíst, tí at trygdarskeiðið manglar.

Eg haldi persónliga - og veit frá royndum - at 15-16 ára gomul gerast ikki sjófólk av einum trygdarskeiði. Eg haldi, at ein ungur persónur, ið vil royna  sjólívið, skal sleppa at royna seg og at vit sum land, kunnu seta okkara egnu krøv til okkara fiskiskip. Bæði skipari og manning á flestu fiskiskipum í Føroyum hava stóran kunnleika til trygd á sjónum og trygdarútgerðin umborð á flest øllum føroyskum skipum er í hásæti. Tí haldi eg, at kravið um trygdarskeið kundi blivið broytt til 18 ár.

Stórur mangul er upp á fólki í vinnuni og tí skulu vit eggja ungum at royna seg, heldur enn at styggja tey burtur.

Skúlin er ikki fyri øll.

Lat tey ungu sleppa at royna seg. Tey eru framtíðin - eisini á sjónum!

X við Christian Guttorm Mathisen