Veðrið um vikuskiftið
Hetta vikuskiftið fer veðrið í Føroyum at vera stýrt av lágtrýstum við Suður- og Eysturgrønland. Tey eru sera djúp, og tað er nógvur vindur og nógv avfall rundan um tey. Tann mesti vindurin røkkur ikki allan vegin til okkum, men tó eitt sindur av honum.
Brúgvaløgini, ið hoyra til hesi lágtrýst røkka allan hendavegin til Føroya.
Nú seinnapartin fríggjadag er ættin landsynningur sunnan, vindferðin er í miðal fyri landið 5 til 10 m/s. Skýggjað er og regn kring alt landið.
Tað fer at regna eina løtu afturat, til brúgvalagið er farið eysturum. Hetta verður um 20 tíðina í kvøld. Tá slítur í, men tó er ælaveður við regni. Vindferðin er væntandi tann sama alt kvøldið og í nátt eisini.
Í morgin ári fer vindurin at veksa eitt sindur, upp í 8 til 13 m/s. Út á fyrrapartin – um 10 tíðina – fer at regna. Hesaferð er tað ein kuldabrúgv, sum fer framvið. Hon ger skjótt av, tí longu um 13 tíðina er hon farin eysturum, og tá slítur í – tó ælaveður, ættin støkkur upp í útsynning, og vindurin veksur upp í 10 til 15 m/s. Og soleiðis er veðrið restina av degnum og um kvøldið eisini.
Sunnunáttina minkar vindurin eitt sindur, niður í 5 til 10 m/s, skýggjað og ælaveður. Út á morgunin lækkar hann niður í útsynning og veksur vindin aftur upp í 10 til 15 m/s, smáskýggjað og turt fyri tað mesta. Út á seinnapartin fer at regna eina løtu. Um kvøldið er aftur turt.