Norðlýsið hevur hitt Jógvan Hansen frá JFK á fiskivinnumessuni í Barcelona, ið verður hildin í hesum døgum. Hann sigur, at nakrir kundar leggjast afturat onkuntíð, men tann stóri parturin av luttøkuni snýr seg um at halda sambondini við líka við teir kundar, JFK longu hevur.

- “Hetta sparir okkum fyri nógvar flogferðir”, sigur Jógvan. “Tað er gott at hava so mong fólk á einum staði her í Barcelona, og okkara básur her er øgiliga væl vitjaður”.

Tilsamans arbeiða 570 fólk í JFK, og fyritøkan hevur 18 skip. Ein stórur nýggjur trolari er á veg, ið er 89 metrar til longdar, 18 metrar til breiddar og væntast og/ella vónast at koma í flotan hjá teimum um 5 vikur. 64 mans verða knýttir at trolaranum, og teir verða skipaðir í tvær manningar à 32 mans (m/k, sjálvandi).

Fyritøkan JFK hevur kundar í Føroyum, Íslandi, Danmark, Canada, USA, Bretland, Frakland, Belgia, Portugal, Spania, Italia, Kina, Holland og Týskland, og arbeitt verður í løtuni við at fáa viðurskiftini í lag fyri at kunna selja til Vietnam. Tað er fyrst og fremst toskur og hýsa, sum JFK (og Kósin) fáast við, og so er nakað av longu, upsa og brosmu eisini.