Mikukvøldið kl. 19 var KKS karmur um fyrilestrarkvøld, har ymsir aktørar hugleiddu um burturkast, skiljing og endurnýtslu.

Øll vórðu eisini samd um, at tað ikki er nøkur skjót og løtt loysn uppá hesa avbjóðing, men at ein raðfesting á hesum øki er neyðug.

Evnið varð lýst av ymiskum pørtum, og fingu áhoyrararnir tískil bæði yvirskipaða, praktiska og sera upplýsandi kunning um, hvat kann gerast, og hvat eigur at verða gjørt fyri at nærkast einari kós, sum er burðardygg.

Kjakið aftaná framløgurnar staðfesti, at tørvur er á einum tílíkum netverki, tí uppgávan er stór, og fyritøkur í dag hava nógv krøv at liva upp til. Tað kann kennast møtimikið at finna orku til at raðfesta nýtt, hóast tilvitskan um týdningin er til staðar. Tá er tað ein stór hjálp at fáa kunning frá m.a. IRF og øðrum fyritøkum, sum hava royndir á hesum økinum.

Annika S. Biskopstø, forkvinna í Heilsunevndini, sigur, at hon gleðist um, at eitt átak sum Virkið vár eisini kann vera karmur um ein slíkan fyrilestur.

- Samstarv millum kommuna, vinnuna og í hesum sambandi IRF er ein avgerðandi liður í arbeiðinum at koma nærri málinum um eina meir skipaða burðardygga kós.

- At KSS eisini er viðspælari og saman við kommununi setur rammurnar fyri einum slíkum fyrilestrarkvøldi, er eisini rós vert, sigur Annika S. Biskopstø, sum sær ljóst uppá, at nøkur felags tøk saktans kunnu flyta nakað.

Í fjør samtykti Klaksvíkar býráð at fara undir eina tilgongd, har arbeitt verður miðvíst við teimum 17 Heimsmálunum fyri burðardyggari menning. Ein liður í hesum er eisini at fáa umhvørvisatlit lýst á sama hátt, sum tilmælir eisini altíð verða lýst við fíggjarligum avleiðingum.