Í morgun er eitt líðið lot eystan, upp í 6 m/s, samdrigið, í støðum eisini mjørki, yvirhøvur turt, men okkurt æl allíkavæl. Somleiðis verður veðrið fyrrapartin í dag.

Út á seinnapartin fara teir fyrstu droparnir í longri tíð at merkjast, við tað at tað verður ælaveður. Sum ikki einaferð, so fer tað at vera ójavnt, hvar ælini raka – mest sunnan fyri, og minst í Norðoyggjum. Í kvøld regnar kring alt landið. Hitin í dag fer at liggja millum 9 og 14 stig.

Í nátt, týsnátt, regnar enn. Fyrrapartin í morgin lækkar ættin niður í sunnan, og vindur veksur upp í 8 til 13 m/s. Seinnapartin slítur í, og annaðkvøld minkar vindurin niður í 3 til 8 m/s. Hitin 8 til 12 stig.

Mikudagin fyrrapart er eitt lítið lot sunnan, minni enn 5 m/s, skiftandi skýloft og okkurt ælið. Seinnapartin lítið lot av ymsum ættum, minni enn 5 m/s, skiftandi skýloft og ælaveður. Hitin mikudagin 9 til 14 stig, í støðum nøkur stig heitari.  

Hósdagin lot til frískt lot, av útsynningi, 3 til 8 m/s, smáskýggjað við sól ella sólglottum, men eisini okkurt ælið. Hitin hósdagin 9 til 15 stig.

Fríggjadagin sunnan og landsynningur, 3 til 8 m/s. Fyrra partin av degnum klárt ella smáskýggjað við sól ella sólglottum, men út á seinnapartin samdrigið og regn. Hitin 10 til 15 stig.

Samanumtikið eitt sindur øðrvísi forsøgn enn undanfarnu vikurnar. Nakað av regni í kvøld og í nátt, ælaveður onkra løtu hinar dagarnar, og so aftur regn fríggjakvøldið og leygarnáttina. Ikki tann stóri vindurin, tó í morgin 8 til 13 m/s, sum er meiri enn vit eru von við fyri tíðina.

Ættin fer at liggja um sunnan fyri ein stóran part, men í løtum landsynningur ella útsynningur. Tá er luftin lýggj og slavin, og tað fara vit at síggja í hitanum og hvussu klárt tað er, ella ikki, at hyggja uppeftir.