KÍ skuldi havt vunnið dystin móti Ferencváros, um nakarm vinnari skuldi verið.

Ferencváros byrjaði nógv betri og skapti tríggjar góðar møguleikar fyrstu 11 minuttirnar. Men eftir tað fekk KÍ gott tamarhald á dystinum og var nærri við restina av dystinum. KÍ-liðið var væl skipað, legði nógv fyri í nærdystunum og dugdi at brúka deyðbóltsstøðurnar. KÍ var fleiri ferðir nær við og eftir einu innkast støðuna skallaði Vegard Forrén á tvørstongina.

Í seinna hálvleiki vóru færri málmøguleikar, men tann størsta fekk Jóannes K. Danielsen, men verjuleikari bjargaði nakað frá linjuni.

Tað endaði 0-0 og tað er í sær sjálvum eitt frálíkt úrslit, hóast Ferencváros framvegis er stórfavorittur at fara víðari. Hetta var fyrsta altjóða uppgávan hjá Magna Hoseth sum venjara og hann stóð av sonnum royndina hóast KÍ manglaði fleiri lyklaleikarar.