34 lomb yvir 100 pund livandi vekt á Skarði
Tey vóru á fjalli á fyri uttan á Skarði á Kunoynni í gjár.
Norðlýsið hitti røktingarmennirnar Jakka Sirdal og Leif Mohr í rættini hjá Strandarhaga í dag, har tøkuseyðurin vanliga kemur á heystardegi. Í dag bleiv seyðurin býttur til eigararnar.
Yvir miðal ár
Røktingarmenninir lótu væl at, nú teir kendu alla livandi vektina og tí kundu samanbera við undanfarnu ár. Teir meta hetta at verða eitt yvir miðal ár fyri uttan á Skarði. Av teimum 140 lombunum, sum teir vigaðu livandi vekt, so vigaðu 34 lomb yvir 100 pund, øll veðurlomb. Tað merkir, at áleið helvtin av veðurlombunum hevur vigað 100 pund ella meir. 100 pund livandi vekt svarar vanliga til 40 pund í miðal, tá tað er flett. Tyngsta veðurlambið vigaði 122 pund, meðan tyngsta gimburlambið vigaði 96 pund.
Mist nakrar fleiri ær
Harði veturin hevur ikki rakt seyðin á Skarði, har seyðurin gongur úti árið runt, hart, men eini 3-5 fleiri ær eru farnar síðani síðsta heyst enn eitt miðal ár. Á rættini hesaferð vóru 172 ær og 166 lomb.
12 fólk og átta hundar vóru við á fjalli. Tey fóru frá húsum kl. 5, vóru á rætt kl. 13 og við hús kl. 18.30.