Nýggjur Gadus birtir vón
Uttan at siga eitt orð fortaldi ongin tað betri enn Christian í Grótinum, at “Kreppan er av!”, tá nýggja flaggskipið í flotanum kom inn á Vágna í Klaksvík í 1998. Norðoyggjar høvdu saman við restini av landinum verið í eini sváraru fíggjarkreppu, men noktaðu at geva seg yvir og bukka undir. Og til bar. Nú hava døkk skýggj aftur lagt seg yvir okkara fiskivinnu, men taka Føroyar eins væl ímóti nýggja Gadus og geva honum grundarlag at virka, so kann enn ein kreppa og stúran í nærsamfelagnum avlýsast
Higartil hava vit einans sæð nýggja Gadus á myndum. Men myndirnar eru nóg mikið til geva eina stak góða magakenslu. Fyrst og fremst sigur Gadus okkum, at vinnan í Norðoyggjum trýr uppá tað. Ongin setir eina knappa hálva milliard í eitt stásiligt nýtt sjófar uttan eina trúgv uppá, at tað loysir seg.
Í løtuni sita nógvar stúrandi familjur kring um í Norðoyggjum. Fleiri teirra eru sperdar, tí matvøruprísirnir fara bara ein veg og sethúsaprísirnir somuleiðis. At kríggj er aðrastaðni í Europa setir eisini síni spor. Í skrivandi stund er verkfall lýst at verða, og vit sóu í gjár, at landskassahallið í ár verður 64 milliónir. Men tað verður sanniliga eisini stúrt fyri, at Landsstýrið fer at gera ilt verri.
Nýggja íbirta vónin, sum kemur við Gadus, krevur, at fleiri enn bara manningin og reiðaríið síggja virðið í íløguni. Umframt at geva umleið 250 fólkum eitt livibreyð, eru stórir ringvirkningar kring eitt reiðarí við undirleverandørum og avleiddum vinnum. Afturat tí koma sponsorat til m.a. ítrótt, sjálvbodnar gávur frá vinnuni, betraðar umstøður til okkara sjófólk og sjálvsagt milliónainntøkur til Landskassan.
Tað var ein takksaman formann í Reyða Krossi Føroya, vit hoyrdu í Góðum Morgni Føroyum og Breddanum hósdagin 28. september. Har nevndi hann tríggjar vælgerandi fyritøkur, sum veita Reyða Krossi døgurðamat, sum Reyði Krossur so gevur víðari til svangar og neyðstaddar familjur í Føroyum. Ein av teimum trimum fyritøkunum var reiðaríið hjá Gadus, JFK, ið veitir teimum flak.
Øll vita eisini, at eitt nýtt skip dálkar munandi minni enn eitt gamalt skip, og í so máta er hetta eitt stórt stig á grønu leiðini. Fyri skammari stund síðani var ph.d.-ritgerð skrivað um strongd millum sjófólk, harí onkrar av niðurstøðunum ikki vóru tespiligar. Nýggja skipið veitir nógv betri umstøður enn tey núverandi, og fer tá uttan iva at minka munandi um strongdina. Afturfyri ynskir vinnan bert tað afturfyri, at teimum verður lív lagað í Føroyum.
Nú nýggi Gadus kemur, so er tað ikki bert reiðarin, ið setir alt sítt álit á politiska myndugleikan um, at Føroyar sum samfelag geva skipinum høvi at virka sambært sínum endamáli. Tað er alt lokalsamfelagið í Norðoya Sýslu og lutvíst í øðrum økjum, sum verða positivt ávirkað av tí. Reiðaríið hevur gjørt sín part við at lata stásiliga skipið byggja, lokalsamfelagið ger sítt við veitingum, og verður landsmyndugleikin eisini ein viðspælari, kann hetta ævintýrið bara enda væl, Føroyum sum samfelagi at gagni.
