Veðrið í dag
Tað er eitt lítið lot av ymsum ættum í morgun. Vindferðin er minni enn 4 m/s kring landið. Loftið er eitt sindur blandað. Í helvtini av landinum er samdrigið, meðan tað er hálvskýggjað og sólglottar í hinari helvtini. Yvirhøvur er turt, men okkurt ælið er í støðum.
Meiri ella minni soleiðis fer veðrið at vera allan dag – tó við tí muni, at so hvørt sum ættin broytist eina løtu, kann skýloftið skifta frá at vera samdrigið til at vera hálv- ella smáskýggjað – ella øvugt. Tað sama er við støðum, har ælini eru eru.
Hitin í dag fer at liggja um 8 til 10 stig.
Gera vit eitt lop 1½ samdøgur fram til í annaðkvøld, tá ið KÍ tekur ímóti Lille á Tórsvølli, so er forsøgnin broytt nakað seinasta døgnið. Eitt regnumráði fer at leggja seg yvir landið sunnaneftir, so við dystarbyrjan eru 3 til 8 m/s av eystri, samdrigið og turt. Nakað eftir at dysturin er byrjaður, veksur vindurin upp í 5 til 10 m/s, og tað fer at regna. Hitin fer at liggja um 9 stig.
Hetta er gott veður til fótbólt – tó er tað altíð eitt gott hugskot at lata seg væl í. Gundadalur er veðurgóður, og Tórsvøllur er næstan innigirdur av høgum bygningum. Ættin fer at liggja inn á bakið á tí stóra skýlinum, har sum inngongdirnar eru.