“At fyritøkur keypa og selja gass og fisk úr Russlandi er eitt, men at Landsstýrið sum statur ger samstarvsavtalu við stýrið hjá Putin er nakað heilt annað” hevur ljóða frá løgmanni Akseli V. Johannesen hesa vikuna. So seint sum í útvarpstíðindunum í kvøld var hetta høvuðsgrundgeving løgmans fyri, at Javnaðarflokkurin er ímóti at gera nýggja samstarvsavtalu við Russland um fiskiveiðuna í Barentshavinum.

Løtu seinni í somu tíðindasending var yvirskriftin, at norski fiskimálaráðharrin í dag hevur undirskrivað samstarvsavtalu við Russland um fiskiveiðuna í Barentshavinum fyri 2024. Og at hetta er ein tann mest týdningarmikla samstarvsavtalan Noregi hevur gjørt, tá hetta tryggjar burðardygga røkt av fiskastovnunum til gagns fyri komandi ættarliðini. Eisini blívur staðfest í tíðindaskrivi frá norsku stjórnini, at fiskivinnugranskarar í londunum báðum nú styrkja um samstarv teirra.

Noregi ger soleiðis beint ímóti meginregluni hjá Akseli V. Johannesen, løgmanni, sum hann hevur trútta alla hesa vikuna. At tað skal vera ein grundleggjandi munur millum tað, at evropeiskar fyritøkur velja at samstarva við russiskar fyritøkur um keyp og sølu av eitt nú gassi og fiski, og so at statir gera samstarvsavtalur við russiska statin.

Har má bara staðfestast, at Aksel V. Johannesen fer fullkomiliga skeivur. Norski staturin er høgt virdur í altjóða høpi, har sjálvur friðarheiðursløn Nobels eisini verður handa í norska høvuðsstaðnum hvørt ár. Allíkavæl breggjar nýtilnevndi norski fiskimálaráðfrúan Cecilie Myrseth í einum tíðindaskrivi í dag av samstarvsavtaluni við Russland:

“Tað er gott, at vit hava gjørt eina fiskiveiðuavtalu við Russland, hóast vit eru í eini heilt óvanligari støðu. Semjan tryggjar eina langtsiktaða og burðardygga umsiting av havøkinum í norðurøkinum, og er heilt grundleggjandi fortreyt fyri, at vit kunnu umsita toskastovnin og hini fiskasløgini í Barentshavinum.”

Fyrr í vikuni tilnevndi norski forsætismálaráðharrin Jonas Gaahr Støre úr Arbejderpartiet Cecilie Myrseth sum nýggjan fiskimálaráðharra. Kanska Aksel V. Johannesen skuldi spurt seg fyri í norska systirflokkinum, um hvørji prinsippir norski staturin arbeiðir eftir, nú samstarvsavtalan við Russland er undirskrivað.