Veðrið í vikuni
Í vikuni, sum fór, at hava lágtrýst gingið beint ímóti Føroyum. Tá ið soleiðis er, er veðrið hjá okkum skiftandi, og lotið kemur av næstan øllum ættum. Tað var tó einki illveður, sum í vikuni frammanundan.
Í vikuni, sum nú byrjar, fara lágtrýstini ikki eystur um Føroyar longur, men fara at liggja úti í miðjum Norðuratlantshavi. Vit fara at liggja eystan fyri miðjuna, har sum ættin vanliga er ímillum sunnan og eystan. Framvegis einki illveður, vindferðin fer ikki upp um einar 13 m/s.
Heldur ikki fer nakað brúgvalag við regni framvið næstu dagarnar. Tó verður ikki turt alla tíðina, men ælaveður í óstabilari luft.
Í morgin – mánadagin – fer ættin fyri tað mesta at liggja av útsynningi, men týsnáttina og nakrar dagar fram fer hann at liggja av eystri. Fram ímóti vikuskiftinum fer hann upp í landnyrðing.
Meðan ættin í nakrar dagar fer at liggja um eystan og viðhvørt landnyrðing, skulu vit vænta, at tað fer at kølna eitt sindur.
Veðrið í vikuni – dag fyri dag:
Mánadag: Um náttina 5 til 10 m/s av útsynningi, smáskýggjað og okkurt ælið. Út á fyrrapartin eitt sindur minni vindur, 3 til 8 m/s. Seinnapartin minkandi vindur, meðan ættin lækkar niður í sunnan. Um kvøldið bert eitt lítið lot, minni enn 5 m/s, smáskýggjað ella klárt og turt fyri tað allarmesta. Hitin fer upp í 10 stig, men um kvøldið og náttina í støðum niður í 4 stig.
Týsdag: Um náttina gongur hann úr suðuri upp í eystan, men bert eitt lítið lot, minni enn 5 m/s, klárt ella smáskýggjað og yvirhøvur turt. Seinnapartin og um kvøldið 3 til 8 m/s av landsynningi, klárt ella smáskýggjað og yvirhøvur turt. Hitin fer at vera nakað tað sama sum dagin fyri – mánadag – úr 4 upp í 10 stig.
Mikudag: Eystan allan dagin, vindferðin um 3 til 8 m/s, smáskýggjað ella klárt og yvirhøvur turt, tó okkurt ælið í støðum um middagsleitið ella út á seinnapartin. Hitin 5 upp í 9 stig.
Hósdag: 3 til 8 m/s av eystri, smáskýggjað og yvirhøvur turt. Út á seinnapartin dregur á luftina, gráari at hyggja uppeftir, og so verður okkurt ælið. Vindurin um kvøldið er 5 til 10 m/s. Eitt sindur kaldari, nú landnyrðingurin og køld eysturætt hava ligið í 2 samdøgur. Hitin fer at liggja úr 2 stigum um náttina upp í 8 stig um dagin.
Fríggjadag: 5 til 10 m/s av landnyrðingi, klárt ella smáskýggjað og bert okkurt ælið. Um kvøldið 8 til 13 m/s, skiftandi skýloft og ælaveður. Hitin 2 til 7 stig.