Eftir tað fara nøkur djúp lágtrýst at koma nærr i Føroyum. Tey fara at ganga eystureftir sunnan fyri Føroyar. Brúgvaløg við nógvari vætu hanga í hesum lágtrýstum, og kring okkurt er eisini fitt av vindi.

Vit skulu tó ikki rokna við stormi í Føroyum, tó at tað verður eitt sindur seinni í vikuni. So væl sleppa tey í Bretlandi og Írlandi ikki. Ávaring er send út um ringt veður har hósdagin. Illveðir hevur fingið navnið Ciarán (hetta er eitt írskt mannfólkanavn).   

Veðrið í vikuni – dag fyri dag:

Mánadagin: Lot til frískt lot av landnyrðingi, 3 til 8 m/s, skiftandi skýloft og yvirhøvur turt, okkurt ælið í støðum. Hitin 4 til 8 stig.

Týsdagin: Lot til frískt lot av landnyrðingi, 3 til 8 m/s, skýggjað ella hálvskýggjað og yvirhøvur turt. Út á seinnapartin veksandi upp í frískt lot til frískan vind, 5 til 10 m/s, fyri tað mesta klárt, í støðum tó smáskýggjað og okkurt ælið. Seint um kvøldið gongur ættin niður í eystan, men um náttina hækkar hann uppaftur í landnyrðing. Hitin 4 til 8 stig.   

Mikudagin: Frískt lot til frískan vind av landnyrðingi, 5 til 10 m/s, smáskýggjað og æl við regni ella vátakava. Seinnapartin veksandi upp í frískan til hvassan vind, 10 til 15 m/s. Um náttina strúkur í vindi upp í skrið, 13 til 18 m/s, skýggjað og regn ella ælaveður. Hitin 4 til 7 stig.

Hósdagin: Strúkur í vindi upp í skrið av landnyrðingi, 13 til 18 m/s, skýggjað og regn ella ælaveður. Seinnapartin frískur vindur upp í hvassan vind, 10 til 15 m/s; um kvøldið og náttina frískur vindur upp í ein strúk, 8 til 13 m/s. Hitin 6 til 10 stig.

Fríggjadagin: Lot til frískt lot av landnyrðingi, 3 til 8 m/s, skýggjað og okkurt ælið. Seint um kvøldið og um náttina frískur vindur upp í ein strúk, 8 til 13 m/s, skýggjað og ælaveður. Hitin 6 til 10 stig.