KÍ var við yvirlutan á nógvum, men HB-arnir vóru skarpari, gjørdi færri avgerandi mistøk og revsaðu mistøkini hjá KÍ.

KÍ var stórfavorittur til stórsteypadystin móti HB. Eisini hóast KÍ var skert í miðverjuni, tí HB, ið hevur smalri hóp enn KÍ, manglaði eins nógvar ella fleiri leikarar enn KÍ.

KÍ sat eisini á tí mesta allan fyrra hálvleik, men langt var millum góðu málmøguleikarnir. 0-0 var í hálvleikinum.

Í seinna hálvleiki legði Páll A. Klettskarð KÍ á odda eftir gott innlegg frá Jóannes K. Danielsen. Men HB svaraði skjótt aftur, tá bólturin kom í armin á Pæturi Petersen. Brotssparkið skoraði Áki Samuelsen uppá. Løtu seinni kom dagsins vakrasta mál, tá Ási P. Dam vann bóltin av Árna Frederiksberg. Hann rak eitt sindur og sendi so eitt langskot upp í málhornið hjá HB. Og løtu seinni kom ungi David Reynheim, ið er hálvur klaksvíkingur, ímillum eina afturlegging frá René S. Joensen og so var 3-1. Árni Frederiksberg minkaði um munin við einum innleggi, sum endaði í málinum. Og hóast KÍ trýsti og spældi 11 móti 10 síðstu 20 minuttirnar, so eydnaðist ikki at skora.

KÍ spældi í eini 4-2-3-1 leikskipan, har miðverjan var mannað av Jákupi B. Andreasen og René S. Joensen, meðan Dan í Soylu og Claes Kronberg vóru á sentrala miðvøllinum. Málmansplássið hevur Ari í H. Petersen fyribils vunnið sær, tí hann spældi allan dystin. KÍ hevur framvegis nógv at arbeiða við, tí flestu dystirnar eru nógv mál farin ígjøgnum í ár.